„საპროდუსერო კომპანია აცხადებს, რომ ჭორები, რომლებიც დანაშაულებრივ ან ნაციონალისტურ მოტივებთან დაკავშირებულ სიკვდილზე ვრცელდება, სიმართლეს არ შეესაბამება და უსაფუძვლოა,“ - განაცხადა „Donna and Shula Productions“-მა. როგორც Reuters-ი და ისრაელის ქსელები იტყობინებიან, Apple TV-ის ჰიტ ჯაშუშური თრილერ-სერიალის „თეირანი“ ისრაელელი პროდიუსერი დანა იდენი კვირას, 52 წლის ასაკში, საბერძნეთის დედაქალაქ ათენში, სასტუმროს ნომერში გარდაცვლილი იპოვეს. აღსანიშნავია, რომ სერიალის მე-4 სეზონის გადაღებები მიმდინარეობდა. გარდაცვალების მიზეზი დადასტურებული არ არის, თუმცა Reuters-ი ადგილობრივ პოლიციელებზე დაყრდნობით წერს, რომ ისინი ადრეული მტკიცებულებებისა და ჩვენებების საფუძველზე, ამ დროისთვის, შემთხვევას პოტენციურ თვითმკვლელობად განიხილავენ. „ეს დიდი მწუხარების მომენტია ოჯახისთვის, მეგობრებისა და კოლეგებისთვის,“ - ნათქვამია საპროდუსერო კომპანია „Donna and Shula Productions“-ის განცხადებაში. კომპანია ასევე გამოეხმაურა სოციალურ მედიაში გავრცელებულ ჭორებს ირანელი აგენტების შესაძლო მონაწილეობის შესახებ: „საპროდუსერო კომპანია აცხადებს, რომ ჭორები, რომლებიც დანაშაულებრივ ან ნაციონალისტურ მოტივებთან დაკავშირებულ სიკვდილზე ვრცელდება, სიმართლეს არ შეესაბამება და უსაფუძვლოა.“ ისრაელის საზოგადოებრივმა მაუწყებელმა Kan-მა განცხადებაში აღნიშნა: „ჩვენ მწუხარებას გამოვთქვამთ ჩვენი კოლეგის და პარტნიორის, ისრაელის საზოგადოებრივ სამაუწყებლო კორპორაციაში მრავალი პროდუქციის, სერიალისა და პროგრამის შექმნაში მონაწილე დანა იდენის გარდაცვალების გამო. დანა იყო ისრაელის სატელევიზიო ინდუსტრიის ერთ-ერთი წამყვანი ფიგურა და ცენტრალური როლი შეასრულა კორპორაციის ყველაზე გამორჩეული და გავლენიანი პროდუქციის შექმნასა და ხელმძღვანელობაში. მისი პროფესიული და პირადი მემკვიდრეობა მომავალი მრავალი წლის განმავლობაში გააგრძელებს ისრაელის ტელევიზიის ფორმირებას.“ ბერძენი პოლიციის ოფიციალური პირების განცხადებით, 52 წლის ქალის ცხედარი მას შემდეგ იპოვეს, რაც მისმა ძმამ მასთან დაკავშირებას რამდენჯერმე წარუმატებლად სცადა. არსებული ცნობებით, ადგილობრივმა პოლიციამ გარდაცვალების მიზეზის დასადგენად აუტოფსიის ჩატარების ბრძანება გასცა და სასტუმროს პერსონალისგან სათვალთვალო კამერების ჩანაწერებისა და ჩვენებების შეგროვება დაიწყო. „თეირანის“ ახლახან გამოსულ მესამე სეზონში ჰიუ ლორი მონაწილეობს. სერიალი, რომლის შექმნაშიც დანა იდენთან ერთად მოშე ზონდერი და მაორ კონი მონაწილეობდნენ, ტონი სენტმა და საიმონ ალენმა დაწერეს, ხოლო რეჟისორი დანიელ სირკინი იყო. მთავარ როლებს ნივ სულთანი (მოსადის ჰაკერი-აგენტი, რომელიც თეირანში ყალბი ვინაობით იპარება), შონ ტუბი და შილა ომი ასრულებენ. მე-3 სეზონში ასევე მონაწილეობენ სასონ გაბაი, ფენიქს რაეი და ბაჰარ პარსი.