ბედ ბანი, ნორტონი, ბარდემი და მორტენსენი რეჟისორ რეზიდენტეს კარიბულ ვესტერნში ითამაშებენ

ბედ ბანი, ედვარდ ნორტონი, ხავიერ ბარდემი და სხვა მრავალი ვარსკვლავი ლეგენდარული მუსიკოსის მომავალ კარიბულ ვესტერნში ითამაშებენ. Deadline-ის ახალი ანგარიშის თანახმად, ბედ ბანის (ნამდვილი სახელი ბენიტო მარტინეს ოკასიო), ნორტონს და ბარდემს ვიგო მორტენსენი შეუერთდებათ მომავალ ფილმში „პორტო რიკო“. ეს ისტორიული ეპოსი ლეგენდარული ლათინოამერიკელი არტისტის, რენე „რეზიდენტე“ პერეს ხოგლარის რეჟისორობით შეიქმნება. Deadline აღნიშნავს, რომ ფილმი აღწერილია, როგორც „ეპიკური კარიბული ვესტერნი და ისტორიული დრამა“ და დაფუძნებული იქნება პუერტო-რიკოელი რევოლუციონერის, ხოსე მალდონადო რომანის, იგივე „თეთრი არწივის“ (Águila Blanca) ცხოვრებაზე. სცენარის თანაავტორი ოსკაროსანი მწერალი ალექსანდრ დინელარისი (Birdman) იქნება. რომანი კუბის განმათავისუფლებელ არმიასთან ერთად კოლონიალიზმის წინააღმდეგ იბრძოდა მე-19 საუკუნის ბოლოს და მნიშვნელოვანი როლი შეასრულა პუერტო-რიკოული იდენტობისთვის ბრძოლაში. რევოლუციონერი ქვეყნის ფოლკლორში ლეგენდად იქცა, თუმცა გაურკვეველია, კონკრეტულად მისი ცხოვრების რომელ ასპექტს გააშუქებს ფილმი. „ბავშვობიდან ვოცნებობდი ჩემი ქვეყნის შესახებ ფილმის გადაღებაზე. პუერტო-რიკოს ნამდვილი ისტორია ყოველთვის დაპირისპირებით იყო გარშემორტყმული“, — განაცხადა რეზიდენტემ. „ეს ფილმი არის იმის დადასტურება, თუ ვინ ვართ ჩვენ — მოთხრობილი ისეთი ინტენსივობითა და პატიოსნებით, როგორსაც ჩვენი ისტორია იმსახურებს“. მიუხედავად იმისა, რომ მორტენსენი, ბარდემი და ნორტონი უკვე დამკვიდრებული მსახიობები არიან, ოკასიოს (ბედ ბანის) მხოლოდ რამდენიმე მთავარი როლი ჰქონდა. ცოტა ხნის წინ ის გამოჩნდა დარენ არონოფსკის ფილმში Caught Stealing, ასევე 2022 წლის ფილმში Bullet Train. მან ასევე მოკლე როლი შეასრულა 2025 წლის „ბედნიერი გილმორი 2“-ში. (წყარო: Deadline)