2023 წელს „ბოროტი მკვდრები: აღზევების“ („Evil Dead Rise“) გამოსვლამდე, „ბოროტი მკვდრების“ ფრენჩაიზის უფლებების მფლობელებმა, სემ რეიმიმ, ბრიუს კემპბელმა და რობ ტაპერტმა განაცხადეს, რომ ისინი უკვე მოუთმენლად ელოდნენ სერიის ახალი ნაწილების წარმოებას. კემპბელმა კი აღნიშნა, რომ მათ იმედი ჰქონდათ, რომ ყოველ ორ ან სამ წელიწადში ახალ გაგრძელებას/სპინ-ოფს გამოუშვებდნენ. გასულ წელს მათ დაამტკიცეს თავიანთი ერთგულება ამ იდეის მიმართ: ფრენჩაიზის ახალი ნაწილის დასაწერად და გადასაღებად დაიქირავეს სებასტიან ვანიჩეკი, რომელმაც სრულმეტრაჟიანი რეჟისორული დებიუტი ფრანგული საშინელებათა ფილმით „Vermin“, იგივე „Infested“-ით შედგა. კიდევ ერთი ნაწილის დასაწერად და გადასაღებად კი ფრენსის გალუპი აიყვანეს, რომლის სრულმეტრაჟიანი რეჟისორული დებიუტი კრიმინალური თრილერით „The Last Stop in Yuma County“ შედგა. ვანიჩეკის „Evil Dead Burn“-ის გადაღებები დასრულდა და მისი კინოთეატრებში პრემიერა 2026 წლის 24 ივლისს არის დაგეგმილი. გალუპი ამჟამად აგროვებს მსახიობებს თავისი ფილმისთვის – რომელსაც შესაძლოა „Evil Dead Wrath“ ერქვას! „Evil Dead Burn“-ისა და გალუპის ფილმის სიუჟეტის დეტალები საიდუმლოდ რჩება, თუმცა სამი კვირის წინ ცნობილი გახდა, რომ გალუპიმ თავის ფილმში შარლოტ ჰოუპი („მონაზონი“), ჯესიკა მაკნემი („მოკვდავი ბრძოლა“), ზაკ გილფორდი („შუაღამის მესა“), ჯოშ ჰელმანი („ფურიოსა: შეშლილი მაქსის საგა“), ელა ნიუტონი („საშიში ცხოველები“), ელიზაბეტ კალენი („გულაგონგი“) და დებიუტანტი ელა ოლიფანტი დაამტკიცა. რობ ტაპერტი პროექტს სემ რეიმისთან ერთად აწარმოებს, ხოლო რომელ ადამი, ხოსე კანიასი, ლი კრონინი და ბრიუს კემპბელი აღმასრულებელი პროდიუსერების მოვალეობას ასრულებენ. სემ რეიმის სრულმეტრაჟიანი რეჟისორული დებიუტი შედგა ორიგინალური ფილმით „ბოროტი მკვდრები“, რომელმაც მაყურებელს საკულტო გმირი ეშ უილიამსი, ბრიუს კემპბელის შესრულებით, წარუდგინა. ეში დაბრუნდა ფილმებში „ბოროტი მკვდრები II“, „სიბნელის არმია“ და სერიალში „ეში ბოროტი მკვდრების წინააღმდეგ“, რაიმიმ კი ეს ფილმები და სერიალის პირველი ეპიზოდი გადაიღო. ფედე ალვარესის მოკლემეტრაჟიანი ფილმის ნახვის შემდეგ, „ბოროტი მკვდრების“ უფლებების მფლობელებმა მას საშუალება მისცეს, სრულმეტრაჟიანი რეჟისორული დებიუტი 2013 წლის „ბოროტი მკვდრებით“ გაეკეთებინა, რომელშიც ეში აღარ ფიგურირებდა. შემდეგ ლი კრონინი დაიქირავეს „ბოროტი მკვდრები: აღზევების“ გადასაღებად, მისი 2019 წლის დებიუტური ფილმის „The Hole in the Ground“ წარმატების საფუძველზე, სადაც ასევე არ იყო ეში. ამიტომ სებასტიან ვანიჩეკის დაქირავება „ბოროტი მკვდრების“ ფილმის გადასაღებად „Vermin“ / „Infested“-ის შემდეგ, ამ ფრენჩაიზისთვის დამახასიათებელი ნაბიჯია, ისევე როგორც ფრენსის გალუპის დაქირავება „The Last Stop in Yuma County“-ის შემდეგ. ასევე, მუშავდება ანიმაციური სერიალი, რომელიც „ეში ბოროტი მკვდრების წინააღმდეგ“ გაგრძელება იქნება. ახალ ზელანდიურ ვებგვერდ The Screen Guild-ზე განთავსებული საწარმოო გეგმის მიხედვით („ბოროტი მკვდრები“ 2013, „ეში ბოროტი მკვდრების წინააღმდეგ“, „ბოროტი მკვდრები: აღზევება“ და „Evil Dead Burn“ – ყველა ახალ ზელანდიაშია გადაღებული, სადაც ტაპერტი ცხოვრობს), „Evil Dead Wrath“-ის სახელწოდების ფილმის გადაღებები ოკლენდში ამ თვეში დაიწყება. ვებგვერდზე სხვა დეტალები არ არის შეთავაზებული.