დაკოტა ჯონსონი, სირშა რონანი და ჯესი ბაკლი ფილმში „სამი ინცესტური და“ ითამაშებენ

დაკოტა ჯონსონი, სირშა რონანი და ჯესი ბაკლი ახალ ფილმში სამ ინცესტურ დას განასახიერებენ. ელის რორვაჰერი ოდრი ნიფენეგერის რომანის, „სამი ინცესტური დის“ (Three Incestuous Sisters) ეკრანიზაციას გადაიღებს. რორვაჰერმა 2023 წელს გადაიღო „ქიმერა“ (La Chimera), რომელშიც ჯოშ ო’კონორი მონაწილეობდა, მის ფილმოგრაფიაში ასევე შედის 2011 წლის „ზეციური სხეული“ (Heavenly Body), 2014 წლის „სასწაულები“ (The Wonders) და 2018 წლის „ბედნიერი როგორც ლაზარო“ (Happy as Lazzaro). Deadline-ის ცნობით, ჯონსონის, რონანისა და ბაკლის გარდა, „სამ ინცესტურ დაში“ ო’კონორიც ითამაშებს. სიუჟეტისა და პერსონაჟების დეტალები ჯერჯერობით გასაიდუმლოებულია; თუმცა, Deadline-ის სტატიაში აღნიშნულია, რომ ფილმის სცენარი, რომელიც რორვაჰერმა და ოტესა მოშფეგმა დაწერეს, 2005 წლის წიგნს მხოლოდ „თავისუფლად“ ეფუძნება. რომანის აღწერაში ვკითხულობთ: „ეს მდიდარი გვერდები სამი ძალიან განსხვავებული დის ისტორიას გვიამბობს: ერთი ლამაზია, ერთი ჭკვიანი და ერთიც ნიჭიერი. დების მეტოქეობის მელოდრამა ვითარდება, როდესაც ერთ-ერთი და სიგიჟემდე ეჭვიანობს მეორის ვნებიანი სასიყვარულო ურთიერთობის გამო. თავბრუდამხვევ კულმინაციამდე მიმავალი ორი შეყვარებულის რომანი საბოტაჟით, სირცხვილითა და სასოწარკვეთით მთავრდება.“ რორვაჰერი ფილმის პროდიუსერია ჯონსონთან და რო დონელისთან ერთად TeaTime Pictures-ისგან და სტივენ რეილსთან ერთად Indian Paintbrush-ისგან. წარმოება აპრილში დაიწყება. ჯონსონი ცოტა ხნის წინ პედრო პასკალთან და კრის ევანსთან ერთად 2025 წლის ფილმში „მატერიალისტები“ მონაწილეობდა, ხოლო ბაკლი ნომინირებული იყო ოსკარზე შარშანდელ ფილმ „ჰამნეტში“ შესრულებული როლისთვის. ბაკლი ასევე მალე გამოჩნდება ფილმში „პატარძალი!“ (The Bride!), რომელიც აშშ-ის კინოთეატრებში მომავალ კვირას გამოვა. რონანმა, თავის მხრივ, შარშან ითამაშა ბრიტანულ კომედიურ ფილმში სახელწოდებით „ცუდი ვაშლები“ (Bad Apples). ის ლინდა მაკარტნის როლზეა დამტკიცებული სემ მენდესის ოთხ „ბითლზის“ ფილმში. ფილმის „სამი ინცესტური და“ გამოსვლის თარიღი ჯერ არ გამოცხადებულა.