დისნეის ერთ-ერთი დაანონსებული ლაივ-ექშენ რიმეიკის პროექტი წინ არ მიიწევს – ყოველ შემთხვევაში, ამ ეტაპზე. 2020 წლის იანვარში, დისნეიმ გამოაცხადა, რომ აპირებდა „ბემბის“ ლაივ-ექშენ რიმეიქის წარმოებას, „მეფე ლომისა“ და „ჯუნგლების წიგნის“ კვალდაკვალ, ფოტო-რეალისტური CGI ანიმაციის გამოყენებით. პროექტის რეჟისორად სარა პოლი იყო მიმაგრებული, სცენარისტებად კი ჟენევა რობერტსონ-დვორეტი და ლინდსი ბირი. თუმცა, წლებია პროექტის შესახებ არანაირი სიახლე არ ყოფილა. რობერტსონ-დვორეტი ახლა Prime Video-ს ჰიტად ქცეული სერიალის „ფოლაუტის“ თანაავტორია, რამაც მას ორი ემის ნომინაცია მოუტანა. მას „ბემბის“ შესახებ „The Direct“-თან ინტერვიუში ჰკითხეს, როდესაც ვიდეოთამაში-სატელევიზიო ადაპტაციას აპიარებდა. „მინიმუმ ხუთი წელია, „ბემბის“ ფილმთან დაკავშირებით არცერთი სიახლე არ მიმიღია“, – განაცხადა რობერტსონ-დვორეტმა. მან ასევე „ფოლაუტს“ „ინტენსიური სრული განაკვეთის სამსახური“ უწოდა და აღიარა: „ასე რომ, მას შემდეგ, რაც „ფოლაუტზე“ დავიწყე მუშაობა, ამ პროექტისგან შორს ვარ და, სიმართლე გითხრათ, არც კი გადამიმოწმებია, რა ხდება. ეს მართალია.“ როგორც ჩანს, არც დისნეიდან არავინ დაკავშირებია მას. პოლიმა და ბირმაც, გავრცელებული ინფორმაციით, დატოვეს პროექტი მისი დაანონსების შემდეგ. ვინაიდან „ფოლაუტი“ მესამე სეზონზე გაგრძელდა, რობერტსონ-დვორეტი, სავარაუდოდ, „ბემბის“ პროექტს აღარ დაუბრუნდება, თუნდაც დისნეიმ მისი განვითარება გადაწყვიტოს. „სამწუხაროდ, უნდა ვთქვა, რომ მე არ ვარ სწორი ადამიანი“, – განაგრძო მან, – „ყოველთვის მხარს ვუჭერ „ბემბის“ ფილმს… ჩემი ყურადღება იმდენად სრულად არის ამ პროექტზე (ფოლაუტზე) მიპყრობილი, რომ ამჟამად არ ვიცი, რა ხდება „ბემბის“ ირგვლივ.“ Walt Disney Company-მ 2020-იან წლებში შეუპოვრად განაგრძო თავისი ანიმაციური კლასიკის რიმეიქების შექმნა, რასაც როგორც დიდი წარმატებები, ასევე ჩავარდნები ახლდა თან. კერძოდ, 2025 წლის „ფიფქიას“ ბოლოდროინდელი მასიური ჩავარდნა იმაზე მიუთითებს, რომ დისნეის უძველესი ფილმების რიმეიქები შესაძლოა მარცხით დასრულდეს. „ბემბი“ 1942 წელს გამოვიდა, ორიგინალური „ფიფქიასა და შვიდი ჯუჯის“ გამოსვლიდან ხუთი წლის შემდეგ. „ფიფქიას“ კინოთეატრებში გამოსვლის შემდეგ, დისნეიმ დროებით შეაჩერა „რაპუნცელის“ რიმეიქის გეგმები, სავარაუდოდ, იმის რწმენით, რომ ინტერესი დისნეის პრინცესების რიმეიქების ან ზოგადად რიმეიქების მიმართ შემცირებული იყო. მაგრამ მას შემდეგ, რაც ლაივ-ექშენ „ლილო და სტიჩმა“ 2025 წელს მილიარდ დოლარზე მეტი შემოსავალი ნახა, კომპანიამ კვლავ განაახლა მუშაობა „რაპუნცელზე“ და ცოტა ხნის წინ მთავარი გმირების ქასთინგიც დააანონსა. გარდა ამისა, ანიმაციურ ფილმ „მოანაზე“ (რომელიც 2016 წელს გამოვიდა) დაფუძნებული ლაივ-ექშენ რიმეიქი ამ ზაფხულს გამოვა. ასევე აღსანიშნავია, რომ „დამბოს“ (1941 წლის ფილმზე დაფუძნებული) 2019 წლის რიმეიქი კიდევ ერთი ჩავარდნა იყო. ეს ბოლო ტენდენციები მიუთითებს, რომ დისნეი, სავარაუდოდ, უბრალოდ მიატოვებს „ბემბის“ პროექტს და უფრო მეტად ფოკუსირდება 21-ე საუკუნის ფილმების რებუტებზე. ირონიულად, საშინელებათა ჟანრის გადააზრება „ბემბი: განკითხვის დღე“ 2025 წელს გამოვიდა და „Rotten Tomatoes“-ზე „ახალი“ სტატუსით 63% დაიმსახურა. დისნეის ყოველთვის შეუძლია „ბემბის“ პროექტს დაუბრუნდეს, მაგრამ, როგორც ჩანს, მათ ახალი შემოქმედებითი გუნდის პოვნა მოუწევთ. „ბემბი“ Disney+-ზე სტრიმინგისთვის ხელმისაწვდომია.