როგორც „ვრაიატისთვის“ ექსკლუზიურად გახდა ცნობილი, Fifth Season-მა შეიძინა ეროტიკული რომანის „ბიუთიფულ ბასტარდის“ უფლებები და გეგმავს მის სატელევიზიო სერიალად ქცევას. რომანი, რომელიც 2013 წელს გამოსცა „საიმონ & შუსტერმა“, დაწერილია ქრისტინა ლორენის ფსევდონიმით, რომლის უკანაც თანაავტორები ქრისტინა ჰობსი და ლორენ ბილინგსი დგანან. ჰობსი და ბილინგსი სატელევიზიო ვერსიის თანაავტორები იქნებიან, პროექტს კი ბილ დუბუკი უხელმძღვანელებს. დუბუკი ასევე პროდიუსერობას გაუწევს კრისტენ კამპოსთან ერთად. ეს უკანასკნელნი ახლახან მუშაობდნენ ერთად „ფიფთ სისონისა“ და „ნეტფლიქსის“ სერიალზე „ჰიზ ენდ ჰერსი“. ოფიციალური აღწერილობის მიხედვით, „ბიუთიფულ ბასტარდი“ მოგვითხრობს ქლოი მილსზე, რომელიც „ჭკვიანი, ამბიციური და კარიერაში სწრაფად მიმავალია – სანამ მისი უფროსი არ გახდება ისეთი გართულება, რომლის იგნორირებაც შეუძლებელია. ბენეტ რაიანი ბრწყინვალე, მომთხოვნი და ჩიკაგოში ახლად დაბრუნებულია, რათა დაეხმაროს ოჯახის გლობალური მედია იმპერიის მართვაში, და ის სრულ კონტროლს ელის – საკუთარ ბიზნესსა და საკუთარ თავზე. რაც მას არ ელის, ეს არის ქლოი: მკვეთრი, უშიშარი უმცროსი აღმასრულებელი, რომელიც ყოველ ნაბიჯზე უპირისპირდება მას და უარს ამბობს მისი ძალით შეშინებაზე. მათი ქიმია მყისიერი და ფეთქებადია, რაც მეტოქეობასა და სურვილს შორის ზღვარს ბუნდოვანს ხდის, რადგან ყოველი კამათი ცდუნებით არის სავსე. როდესაც ამბიცია მიზიდულობას ეჯახება, ქლოიმ და ბენეტმა უნდა გადაწყვიტონ, რამდენად რისკის გაწევა ღირს კავშირისთვის, რომელიც არ აპირებს პროფესიულ ფარგლებში დარჩენას.“ ეს რომანი იყო პირველი იმ წიგნების სერიიდან, რომელიც ცნობილი გახდა, როგორც „ბიუთიფულის“ სერია. მას შემდეგ კიდევ ცხრა რომანი და ნოველა გამოქვეყნდა, წიგნები კი 30-ზე მეტ ენაზეა ნათარგმნი. „ბიუთიფულ ბასტარდი“ საერთაშორისო ბესტსელერად იქცა, მოხვდა „ნიუ იორკ თაიმსისა“ და „იუსეი თუდეის“ ბესტსელერთა სიებში და ნომინირებული იყო „გუდრიდსის“ მკითხველთა რჩეული რომანტიკული წიგნის ჯილდოზე. ჰობსმა და ბილინგსმა 21 „ნიუ იორკ თაიმსის“ ბესტსელერი რომანი დაწერეს. მათ მრავალი ჯილდო აქვთ მიღებული თავიანთი ნამუშევრებისთვის, ხოლო მათი რომანი „ინ ე ჰოლიდეიზ“ „ნეტფლიქსისთვის“ ადაპტირდება, სადაც რობ ლოუ და მედი ზიგლერი ითამაშებენ. ქრისტინა ლორენს წარმოადგენენ WME, Root Literary და Weintraub Tobin. დუბუკს წარმოადგენენ WME და Goodman Genow. კამპოს წარმოადგენენ WME და The Nord Group LLP.