კარენ გილანი („გალაქტიკის მცველები“), ჯოშ ჰაჩერსონი („ხუთი ღამე ფრედისთან“) და კლაივ ოუენი („ცოდვების ქალაქი“) ეგზორციზმის თრილერ „ბლასფემუსში“ ითამაშებენ, იტყობინება Deadline. „ჰელრეიზერის“ (2022) და „ღამის სახლის“ თანაავტორი ლუკ პიოტროვსკი თავისი სცენარის მიხედვით გადაიღებს სრულმეტრაჟიან ფილმს, რომელიც 2023 წლის „შავ სიაში“ მოხვდა. ფილმში ორი სასულიერო პირი — ახალბედა მღვდელი (ჰაჩერსონი) და მისი ერთგული მენტორი (ოუენი) — შეპყრობილი ახალგაზრდა ქალი (გილანი) ეგზორციზმისთვის უსაფრთხო ადგილას უნდა გადაიყვანონ. ყველაფერი თავდაყირა დგება, როდესაც ქალი მოულოდნელად გაიქცევა, რაც მათ სიცოცხლესა და რწმენას უდიდესი გამოცდის წინაშე აყენებს. დუეინ „ზ როკი“ ჯონსონი, დენი გარსიასა და ჰირამ გარსიასთან ერთად Seven Bucks Productions-ის („ჯუმანჯის“ ფრენჩაიზი) სახელით პროდიუსერობას უწევს ფილმს, Badlands-ის (The Pope’s Exorcist) სკოტ სტრაუსთან, Thunder Road-ის („ჯონ უიკი“) ბეზილ ივანიკსა და ერიკა ლისთან, ასევე Red Riot Pictures-ის გილანსა და ჯეს ბიდლთან ერთად. მაიკლ როტშტეინი, სემიუელ ჰოლი და უორენ გოზი North.Five.Six-ის სახელით აღმასრულებელი პროდიუსერები იქნებიან, ხოლო კიმბერლი ბიალეკი Seven Bucks Productions-ის მხრიდან ზედამხედველობას გაუწევს პროექტს. „„ბლასფემუსი“ ერთ-ერთი საუკეთესო სცენარია, რაც პროდიუსერთა ჯგუფს ოდესმე წაუკითხავს“, — განაცხადა სტრაუსმა. „ეს არის უნიკალური ჟანრული მოგზაურობა, რომელიც გამოირჩევა მახვილგონივრული დიალოგებით, დამაჯერებელი პერსონაჟებითა და ძლიერი იდეებით. მოუთმენლად ველით, თუ როგორ დაეხმარებიან კლაივი, კარენი და ჯოშ ლუკას ამ უნიკალური ხედვის განხორციელებაში.“ გადაღებები აგვისტოში, ნიუ-იორკში დაიწყება. North.Five.Six და CAA Media Finance პროექტის გაყიდვებს ბერლინის ევროპულ კინობაზრობაზე მომავალ თვეში დაიწყებენ.