კრის ჰემსვორთი: თორის როლმა შფოთვის დაძლევასა და თავდაჯერებულობის მოპოვებაში დამეხმარა

კრის ჰემსვორთმა ცოტა ხნის წინ ისაუბრა Marvel-ის კინემატოგრაფიულ სამყაროში (MCU) თორის საკულტო როლზე. მან გაამხილა, თუ როგორ დაეხმარა სუპერგმირის განსახიერება მას დაცულად და თავდაჯერებულად ეგრძნო თავი კარიერის ადრეულ ეტაპზე. „Guardian“-თან ინტერვიუში კრის ჰემსვორთმა აღნიშნა, რომ თორის როლის შესრულებამ მას შესაძლებლობა მისცა, შეექმნა თავისი თავის უფრო თავდაჯერებული ვერსია ინტერვიუებისთვის და საჯარო გამოსვლებისთვის. მისი თქმით: „პერსონაჟი, რომელსაც ინტერვიუებში ხედავთ და ჩემი თავის პრეზენტაცია ჰოლივუდში მუშაობის ბოლო ორი ათწლეულის განმავლობაში – ეს მე ვარ, მაგრამ ასევე შექმნილი იმიჯია. ეს არის ის, რაც მეგონა, რომ ხალხს უნდოდა ენახა.“ საკულტო როლზე დამტკიცების შემდეგ, მან თქვა, რომ თავს „ბევრად უფრო უხერხულად და მოუხერხებლად“ გრძნობდა, ვიდრე საჯაროდ აჩვენებდა. კულისებში მას სერიოზული სცენის შიში და პანიკური შეტევები აწუხებდა. თორის როლისთვის ვარჯიშმა ის დიდად შეცვალა. ჰემსვორთმა უამრავი საათი დაუთმო კუნთების გაკაჟებას, უფრო მაღალი პოზის მიღებასა და ხმის გაღრმავებას, რათა ღმერთის ძალას შესაბამისი ფორმა მიეცა. ამ ფიზიკურმა ცვლილებებმა მას მენტალურად გაძლიერებაშიც შეუწყო ხელი. „დავიწყე ფიქრი: „კარგი, არავინ ვერ შეძლებს ჩემთან არევას. ღმერთის თამაში უსაფრთხო ბადედ იქცა. მან ხალხი დაარწმუნა, რომ მე ასეთი თავდაჯერებული ვიყავი, ასეთი მტკიცე,“ – განაცხადა მან. ჰემსვორთმა თორი Marvel-ის კინემატოგრაფიული სამყაროს ცხრა ფილმში ითამაშა და Marvel-ის ერთ-ერთ უმსხვილეს ვარსკვლავად იქცა. თორის როლში მისი ბოლო გამოჩენა იყო 2022 წლის ფილმში „თორი: სიყვარული და ჭექა-ქუხილი“. ის კვლავ დაუბრუნდება ლეგენდარულ როლს. ფანებმა ცოტა ხნის წინ თორი ნახეს „შურისმაძიებლების: განკითხვის დღე“ (Avengers: Doomsday) თიზერში. თიზერში ის მამობის გამოცდილებაზე საუბრობს გარდაცვლილ მამასთან, ოდინთან.