ავტორი: ქარიზმა მადარანგი რობერტ ქერადაინის გარდაცვალების მიზეზი დადასტურდა მას შემდეგ, რაც ის ამ კვირის დასაწყისში, ორშაბათს, 23 თებერვალს, 71 წლის ასაკში გარდაიცვალა. ლოს-ანჯელესის სამედიცინო ექსპერტიზის სამსახურის ცნობით, მსახიობის გარდაცვალება თვითმკვლელობად შეფასდა. გარდაცვალების მიზეზად დასახელდა ანოქსიური ტვინის დაზიანების შედეგები, რაც ხდება მაშინ, როდესაც ტვინს ჟანგბადი მთლიანად შეუწყდება. ქერადაინი ყველაზე ცნობილი იყო ოთხმოციანი წლების საკულტო კლასიკაში „ნერდების შურისძიება“ მონაწილეობით, მოგვიანებით კი, 2000-იანი წლების დასაწყისში, „დისნეის არხზე“ სერიალით „ლიზი მაკგუაირი“, თაყვანისმცემელთა ახალი თაობა მოიპოვა. „ღრმა მწუხარებით ვაუწყებთ, რომ ჩვენი საყვარელი მამა, ბაბუა, ბიძა და ძმა რობერტ ქერადაინი გარდაიცვალა“, - ნათქვამია ქერადაინის ოჯახის წინა განცხადებაში. „სამყაროში, რომელიც ასე ბნელად გვეჩვენება, ბობი ყოველთვის სინათლის შუქურა იყო ყველასთვის. ჩვენ დამწუხრებულნი ვართ ამ მშვენიერი სულის დაკარგვით და გვსურს, აღვნიშნოთ ბობის თავდადებული ბრძოლა მის თითქმის ორ ათწლეულიან ბიპოლარულ აშლილობასთან. ვიმედოვნებთ, რომ მისი ცხოვრება შუქს მოჰფენს და წაახალისებს იმ სტიგმის მოგვარებას, რომელიც ფსიქიკურ დაავადებებს უკავშირდება.“ მისი გარდაცვალების შესახებ ცნობის გავრცელების შემდეგ, მსახიობის კოლეგებმა „ლიზი მაკგუაირიდან“ და ჰოლივუდის სხვა მეგობრებმა მისი მემკვიდრეობა გულწრფელი პატივისცემით გაიხსენეს. ჰილარი დაფმა, რომელიც ტიტულოვან პერსონაჟ ლიზის განასახიერებდა, ინსტაგრამზე გააზიარა მისი და ქერადაინის ფოტოები, რომელიც მის მამას, სემ მაკგუაირს თამაშობდა. წარწერაში დაფმა დაწერა: „ეს მტკივნეულია. ძალიან რთულია ძველ მეგობართან დაკავშირებული ამ რეალობის მიღება. მაკგუაირების ოჯახში იმდენი სითბო იყო და მე ყოველთვის ვგრძნობდი ჩემი ეკრანული მშობლების მზრუნველობას. ამისთვის სამუდამოდ მადლიერი ვიქნები. ღრმად მწუხარებას გამოვთქვამ, რომ ბობი იტანჯებოდა. ჩემი გული მას, მის ოჯახს და ყველას, ვინც მას უყვარდა, სტკივა.“