ფილმ „მუმიის“ თაყვანისმცემლები გაახარა „Universal“-ის გასულწლიანმა განცხადებამ ბრენდან ფრეიზერისა და რეიჩელ ვაისის ფრანჩაიზში დაბრუნების შესახებ, ახალი ფილმისთვის. მიუხედავად იმისა, რომ სტუდიას ჯერ კიდევ დიდი დრო აქვს ფილმის გადაღებების დასრულებამდე, ახლა უკვე ოფიციალურად დაანონსდა მისი გამოსვლის თარიღი. თუმცა, ნუ იჩქარებთ, რადგან ის დიდ ეკრანებზე ორ წელზე მეტი ხნის შემდეგ გამოვა. ფილმის პრემიერა კინოთეატრებში 2028 წლის 19 მაისს შედგება, თითქმის 30 წლის შემდეგ, რაც ორიგინალი ფილმი ეკრანებზე 1999 წელს გამოვიდა. ფილმის რეჟისორი იქნება საშინელებათა ფილმების შემოქმედებითი კოლექტივი Radio Silence, რომელთაც უკვე ჰქონდათ შეხება „Universal Horror“-ის სამყაროსთან 2024 წლის ფილმ „აბიგეილში“, რომელიც 1936 წლის „დრაკულას ქალიშვილის“ თავისუფალი რიმეიქია. სცენარზე დევიდ კოჯეშალი იმუშავებს („ობოლი: პირველი მკვლელობა“). სიუჟეტის დეტალები ჯერჯერობით გასაიდუმლოებულია, თუმცა გავრცელებული ინფორმაციით, ფილმი „მუმიისა“ და 2001 წლის „მუმია ბრუნდება“-ს გაგრძელება იქნება, მაგრამ უგულებელყოფს 2008 წლის „მუმია: დრაკონის იმპერატორის სამარხის“ მოვლენებს. აღნიშნულ ფილმში ფრეიზერი მონაწილეობდა, თუმცა ვაისის როლი მარია ბელომ შეასრულა; ეს იყო სამი ფილმიდან ყველაზე ნაკლებად შემოსავლიანი და ყველაზე ცუდად შეფასებული. ფილმ „მუმიაში“ ვაისი კაიროს ბიბლიოთეკარ ეველინ კარნაჰანს განასახიერებს, რომელიც თავის უდარდელ ძმასთან, ჯონათანთან (ჯონ ჰანა) და ავანტიურისტ რიკ ო'კონელთან (ფრეიზერი) ერთად, 1926 წელს გაემგზავრება დაკარგული ეგვიპტური ქალაქ ჰამუნაპტრას საძიებლად. როდესაც ისინი რიკის მოღალატე ყოფილი თანამებრძოლის, ბენის (კევინ ჯ. ო'კონორი) მიერ ხელმძღვანელებულ მეტოქე ექსპედიციას ეჯიბრებიან, შემთხვევით ათავისუფლებენ იმჰოტეპს (არნოლდ ვოსლო), მეამბოხე ეგვიპტელ მღვდელს, რომელიც ათასობით წლის წინ ცოცხლად იქნა მუმიფიცირებული. არდეთ ბეის (ოდედ ფეჰრი) დახმარებით, რომელიც ჰამუნაპტრას საიდუმლოდ შენახვისთვის თავდადებული უძველესი ორდენის წევრია, მათ იმჰოტეპი მარადიულ განსასვენებელში უნდა დააბრუნონ, სანამ ის ღვთიურ ძალას მოიპოვებს. გაგრძელებაში, „მუმია ბრუნდება“, რიკი და ეველინი დაქორწინდნენ და პატარა ვაჟი, ალექსი (ფრედი ბოათი) შეეძინათ; ისინი, ჯონათანი და ბეი მალე აღმოჩნდებიან იმჰოტეპის და მისი რეინკარნირებული შეყვარებულის, მილა ნაისის (პატრიცია ველასკესი) მიერ მოწყობილ შეთქმულებაში, რომლის მიზანიც უძველესი მორიელის მეფის (დუეინ ჯონსონი) ძალის გაღვიძებაა. ფრეიზერისა და ვაისის მონაწილეობით ახალ „მუმიას“ არანაირი კავშირი არ აქვს „ბოროტი მკვდრების აღზევების“ რეჟისორ ლი კრონინის „მუმიასთან“, რომელიც „New Line Cinema“-ს მიერ აპრილში უნდა გამოვიდეს. მასში მონაწილეობენ ჯეკ რეინორი, ლაია კოსტა და მეი ქალამავი. ახალი „მუმიის“ ფილმი, რომელიც ბრენდან ფრეიზერსა და რეიჩელ ვაისს აერთიანებს, კინოთეატრებში 2028 წლის 19 მაისს გამოვა.