Prime Video-მ ტელესერიალ „Sex Criminals“-ს მწვანე შუქი აუნთო. „Sex Criminals“ არის Image Comics-ის სერია, რომლის სცენარი მეტ ფრეკშენს ეკუთვნის, ილუსტრაციები კი ჩიპ ზდარსკის. სერიალი ოფიციალურად 2013 წელს დაიწყო და 31 გამოცემას მოიცავდა, ექვს ტომად. მისი სიუჟეტი ორი ადამიანის გარშემო ვითარდება, რომლებიც აღმოაჩენენ, რომ სექსის დროს დროის გაჩერება შეუძლიათ, რასაც შემდგომ ბანკების გასაძარცვად იყენებენ. Deadline-ის ცნობით, Amazon MGM Studios-მა „Sex Criminals“-ის ტელესერიალს რვა ეპიზოდი შეუკვეთა. მისი სცენარის ავტორები კუმეილ ნანჯიანი, ემილი ვ. გორდონი და ცე ჩუნი არიან. ნანჯიანი, რომელიც გორდონის მეუღლეა, სერიალში მთავარ როლსაც შეასრულებს. კომიქსის პირველი ნომრის ანოტაციაში ვკითხულობთ: „სიუზი ჩვეულებრივი გოგონაა არაჩვეულებრივი უნარით: როცა სექსი აქვს, ის დროს აჩერებს. ერთ ღამეს ის ჯონს ხვდება… რომელსაც იგივე ნიჭი აქვს. და ამიტომ ისინი აკეთებენ იმას, რასაც ნებისმიერი სხვა სექსის მქონე, დროის გამჩერებელი წყვილი გააკეთებდა: ისინი ბანკებს ძარცვავენ.“ შოუს შექმნაში მარგო რობის LuckyChap Entertainment მონაწილეობს. სან და დანი გორინი, გორდონთან, ნანჯიანთან, Winter Coat Films-ის წარმომადგენელ დანი მელიასთან, ასევე ფრეკშენთან და ზდარსკისთან ერთად, „Sex Criminals“-ის აღმასრულებელი პროდიუსერები იქნებიან. პროდიუსერი ლუი ჰეისი იქნება. „„Sex Criminals“ ზუსტად ისეთი რამაა, რისი გაცოცხლებაც Winter Coat-ს სურს: სასიყვარულო ისტორიები უცნაურ ადგილებში“, – განაცხადეს გორდონმა და ნანჯიანმა. „იმ მომენტიდან, რაც LuckyChap-მა მეტისა და ჩიპის კომიქსი მოგვიტანა, ვიცოდით, რომ გვინდოდა ამ პერსონაჟების ეკრანზე გადატანა და მოხარულები ვართ, რომ ამას ცე ჩუნთან და Prime Video-სთან ერთად გავაკეთებთ.“ ფრეკშენმა და ზდარსკიმ დაამატეს: „აღფრთოვანებულები ვართ, რომ ასეთი ნიჭიერი ადამიანები ჩვენს „სულელურ“ კომიქსს აცოცხლებენ.“ Amazon MGM Studios-ის პიტერ ფრიდლენდერმა თქვა: „„Sex Criminals“ არის თამამი, სასაცილო და ველურად ორიგინალური, რომლის გულშიც სასიყვარულო ისტორიაა, რომელიც ღრმად ადამიანური და სრულიად მოულოდნელია.“ „ემილიმ, კუმეილმა და ცემ ამ წარმოუდგენელ ნაწარმოებს ახალი და ემოციურად დაფუძნებული ხედვა შესძინეს. ჩვენს კოლაბორატორებთან – LuckyChap-თან, Winter Coat Films-თან და კომიქსის შემქმნელებთან – მეტ ფრეკშენთან და ჩიპ ზდარსკისთან ერთად, მოხარულები ვართ, რომ ამ დაუვიწყარ სამყაროს და მის პერსონაჟებს ჩვენს გლობალურ Prime Video აუდიტორიას წარვუდგენთ.“