რეჟისორ ჯო კარნაჰანს ყოფილი შეყვარებული სექსუალურ ძალადობაში, თავდასხმასა და თვალთვალში ადანაშაულებს

რეჟისორ ჯო კარნაჰანს, ფილმ „The Rip“-ის ავტორს, ყოფილმა შეყვარებულმა, მიშელ კროსბიმ, სექსუალური ძალადობის, თავდასხმისა და თვალთვალის ბრალდებით სასამართლოში უჩივლა. კარნაჰანს სექსუალურ ძალადობაში, თავდასხმასა და თვალთვალში ადანაშაულებს მიშელ კროსბი, რომელიც რეჟისორს 2020 წელს შეხვდა და მალევე დაიწყო მასთან შეხვედრები. მათი ურთიერთობა 2024 წელს დასრულდა. სარჩელი, რომელიც გამოცემა TheWrap-მა მოიპოვა, ირწმუნება, რომ რეჟისორი მას ურთიერთობის განმავლობაში არაერთხელ ფიზიკურად გაუსწორდა. სარჩელში დეტალურად აღწერილია 2024 წელს სასტუმროში მომხდარი ერთ-ერთი ინციდენტი, რომელიც „ძალადობრივი გახდა, როდესაც კარნაჰანმა მოულოდნელად თმებში წაავლო ხელი, მაშინ როდესაც ქალი მას გაჩერებას სთხოვდა.“ კროსბიმ ეს ინციდენტი „ფიზიკური ძალადობის ნიმუშის“ ნაწილად შეაფასა. ინციდენტის გამო მან მიმართა რივერსაიდის ოლქის სამართალდამცავ ორგანოებს, ასევე ლოს-ანჯელესის პოლიციის დეპარტამენტს (LAPD) ბრალდებით, რომ კარნაჰანი მას თვალთვალებდა. რივერსაიდის ოლქმა უარი თქვა ინციდენტის შემდგომ განხილვაზე „საკმარისი მტკიცებულებების არარსებობის გამო.“ LAPD-მა ასევე უარი თქვა რეჟისორის წინააღმდეგ ბრალის წაყენებაზე, თუმცა კროსბიმ მის წინააღმდეგ მეორე სარჩელი შეიტანა. კროსბის სარჩელში აღნიშნულია სექსუალური ძალადობა, თავდასხმა, თვალთვალი და ხელშეკრულების დარღვევა იმ დაპირებების გამო, რომლის მიხედვითაც ის და კარნაჰანი ერთად საპროდიუსერო კომპანიას დააარსებდნენ. იგი მოითხოვს დაუზუსტებელ კომპენსაციას, თუმცა სულ მცირე 3 მილიონ დოლარს ძვირადღირებული ნივთებისთვის, რომლებიც, მისი თქმით, კარნაჰანმა მოიპარა. ეს ახალი ბრალდებები წარმოადგენს საპასუხო სარჩელს, რომელიც ლოს-ანჯელესის უმაღლეს სასამართლოში მას შემდეგ შევიდა, რაც კარნაჰანმა კროსბის წინააღმდეგ სარჩელი შეიტანა პორშესთან დაკავშირებით, რომელიც მან კროსბის დროებით ასესხა. ავტომობილი დაზიანდა და კროსბიმ, სავარაუდოდ, უარი თქვა მის დაბრუნებაზე. კარნაჰანმა მისი წარმომადგენლის მეშვეობით გავრცელებულ განცხადებაში უარყო კროსბის ბრალდებები, რომლებიც ახალ სარჩელში იყო მითითებული. „ეს იყო სრულიად კონსენსუალური ურთიერთობა, რომელიც 2024 წლის გაზაფხულზე დასრულდა და მას შემდეგ მეორე მხარე მუდმივად ემუქრებოდა ჯოს ზუსტად იმით, რასაც ახლა კითხულობთ – მუქარით, რომ საჯაროდ თავს დაესხმებოდა ჯოს, როდესაც მისი ფილმი გამოვიდოდა,“ – ნათქვამია განცხადებაში. „ჯოს წინააღმდეგ ბრალდებები 2025 წლის ივლისში მოხსნილი იქნა და მას გასული წლის მაისის შემდეგ ბრალდებულთან არანაირი კონტაქტი არ ჰქონია სასამართლოს გარეთ, მაშინ როდესაც ცდილობდა მის წინააღმდეგ მუდმივი შემაკავებელი ორდერის მოპოვებას.“ განცხადებაში ასევე აღნიშნულია: „ჯო მზადაა, ბოლომდე მიიყვანოს ეს პროცესი თავისი შვილებისა და მათი უსაფრთხოების გამო და იმედოვნებს, რომ მეორე მხარე საჭირო დახმარებას მიიღებს.“ კარნაჰანის ფილმოგრაფიაში შედის „ნაცრისფერი“ (The Grey), „ნარკოტიკი“ (Narc), „მწეველი ტუზები“ (Smokin’ Aces) და „ცუდი ბიჭები სამუდამოდ“ (Bad Boys For Life), ასევე მისი ახალი Netflix-ის ფილმი „The Rip.“ ახალმა ფილმმა, რომელშიც მთავარ როლებს მეტ დეიმონი და ბენ აფლეკი ასრულებენ, სტრიმინგ პლატფორმას „Happy Gilmore 2“-ის შემდეგ საუკეთესო კინოდებიუტი მოუტანა 41.6 მილიონი ნახვით.