სერიალ „Suits LA“-ის ვარსკვლავი, სტივენ ამელი, Fox-ისა და Fremantle-ის მომავალი „Baywatch“-ის რიმეიქის მთავარ როლში, ჰობი ბუჩენონის ამპლუაში მიიღეს. ცნობილი მსახიობი სასამართლო დარბაზიდან პლაჟზე გადაინაცვლებს, ხოლო სერიალის ეთერში გასვლა 2026-2027 წლების სეზონზეა დაგეგმილი. „პირველივე საუბრიდან სტივენ ამელმა ზუსტად ის მოიტანა, რასაც „Baywatch“-ის ეს ახალი თავი მოითხოვს: გული, ინტენსივობა და გმირის ენერგია“, – განაცხადა აღმასრულებელმა პროდიუსერმა და შოურანერმა მეთ ნიქსმა. „ის ისეთი წამყვანი მსახიობია, რომელსაც შეუძლია საშიშროებაში შევარდნა, ემოციური სიმძიმის ტარება და ამავდროულად ყველაფრის სახალისოდ წარმოჩენა. მოუთმენლად ველით დაწყებას“. რიმეიქში ორიგინალური სერიალის „ველური ბავშვი“ – ჰობი ბუჩენონი (რომელსაც ჯერემი ჯექსონი 1991-1999 წლებში თამაშობდა) – უკვე ზრდასრული მამაკაცია. ის „Baywatch“-ის კაპიტანია, რომელიც მიჰყვება თავისი ლეგენდარული მამის, მიტჩის (დევიდ ჰასელჰოფის მიერ ნათამაშები ორიგინალში) კვალს. ჰობის სამყარო თავდაყირა დგება, როდესაც მის კართან ჩარლი ჩნდება – ქალიშვილი, რომლის არსებობის შესახებაც მან არ იცოდა. ჩარლის სურს, გააგრძელოს ბუჩენონების ოჯახის მემკვიდრეობა და მამასთან ერთად „Baywatch“-ის მაშველი გახდეს. სერიალის გადაღებები, გავრცელებული ინფორმაციით, მიმდინარე გაზაფხულზე დაიწყება ლოს-ანჯელესში, Venice Beach-ზე, ასევე Century City-ში, Fox Studio Lot-ზე. დამატებითი ინფორმაცია ქასთინგის შესახებ ამ დროისთვის უცნობია. ორიგინალური „Baywatch“, რომელიც პირველად 1989 წელს გამოვიდა ეთერში, საბოლოოდ მსოფლიოში ყველაზე ყურებადი შოუ გახდა. ის 200-ზე მეტ ქვეყანაში გადიოდა და პიკის მომენტში ყოველკვირეულად მილიარდზე მეტ მაყურებელს იზიდავდა. პლაჟის თემატიკის სერიალში დევიდ ჰასელჰოფი თამაშობდა მიტჩს, მალიბუს პლაჟის მაშველთა ჯგუფის თავდადებულ ლიდერს. ჰასელჰოფის გარდა, შოუმ ხელი შეუწყო საერთაშორისო სუპერვარსკვლავების კარიერის დაწყებას, პამელა ანდერსონიდან და კარმენ ელექტრადან ჯეისონ მომოასა და იასმინ ბლითამდე. გავრცელებული განცხადების თანახმად, „ახალი სერიალი აღნიშნავს ფრენჩაიზის ხანგრძლივ მემკვიდრეობას, ამავდროულად განაახლებს მას დღევანდელი გლობალური აუდიტორიისთვის. თაყვანისმცემლებს შეუძლიათ ელოდონ ადრენალინით სავსე სამაშველო ოპერაციებს, რთულ ურთიერთობებს, კომპლექსურ ქიმიასა და პლაჟის გმირულ თავგადასავლებს, რამაც განსაზღვრა ორიგინალი – ახლა უკვე სრულიად ახალი სამსახიობო შემადგენლობით, თანამედროვე ატრიბუტებით, დაძაბულობითა და გამოწვევებით, ასევე განახლებული მისიით, დაიცვას სამხრეთ კალიფორნიის სანაპირო ზოლი“. ამ დროისთვის უცნობია, ითამაშებენ თუ არა ანდერსონი, ჰასელჰოფი ან სხვა ნაცნობი სახეები მომავალ რიმეიქში, მაგრამ კარმენ ელექტრამ ადრე განაცხადა, რომ დაინტერესებული იქნებოდა, თუ შეთავაზებას მიიღებდა. „სახალისო იქნება“ რიმეიქის ქასთში გაწევრიანება, რაზეც, მისი თქმით, ამჟამად მოლაპარაკებებს აწარმოებს, განუცხადა ელექტრამ TMZ-ს გასულ წელს. თუმცა, მას ერთი პირობა აქვს: „არ ვიცი, მოვინდომებ თუ არა წყალში ყოფნას“. „ეს ხომ ოკეანეა, იცით? მიყვარს ოკეანესთან ყოფნა. მასში მუშაობა სულ სხვაა. როდესაც ოკეანეში მუშაობ, ეს ძალიან რთულია“, – განმარტა ელექტრამ. „Baywatch“-ის პროდიუსერები არიან Fox Entertainment და Fremantle, ხოლო შოურანერისა და აღმასრულებელი პროდიუსერის ფუნქციებს მეთ ნიქსი (ცნობილი სერიალებით „Burn Notice“, „The Gifted“) ასრულებს. აღმასრულებელი პროდიუსერები არიან ასევე McG, მაიკლ ბერკი, გრეგ ბონანი, დაგ შვარცი, დანტე დი ლორეტო და მაიკ ჰოროვიცი. McG სერიალის პრემიერულ ეპიზოდს გადაიღებს.